我又去食 － 鹹雞

前兩日同kiki講開海南雞飯，　引到我個胃都識跳咁滯，　尋晚食唔到，　個人都不知幾痛苦，　仲要諗起好耐之前，　無意中睇到苯ｂ媽媽介紹元朗有好味雞飯，　今晚就一於夾男友去食呢間，　一解我同果隻雞嘅相思之苦先～～

入到元朗都成８點幾lu，　一坐低就咩都唔駛講，　我就要個鹹雞飯（$41），　男友就揀咗咖哩雞髀飯（$21），　因為聞到ｄ咖哩好濃好香嘛～～

鹹雞真係好好味呀～～～～　好有雞味，　又嫩滑，　連ｄ雞皮都好好味，　hey～～　我無食哂ｄ雞皮啦．．．　（食咗一半咁啫．．． 😛 ）

個薑蓉呢．．．　薑就刨得幾好，　不過蔥就大粒得滯，　調味都ok，　係ｄ油就勁多，　我要用匙羹筆起哂ｄ薑蔥先點到黎食．

而個菜飯就唔知係咪要就番個鹹雞，　所以就無味嘅，　不過ｄ菜仲好新鮮，　唔會蒸到老哂．

其實個餐好大個o架，　連我呢ｄ大食開嘅，　今次都食唔到照哂鏡，　仲差少少呀．

男友嘅咖哩果然好香濃，　唔算太辣，　不過可惜隻雪藏雞髀d肉好實，　所以就失咗少少分，　下次試吓豬扒／牛腩先，　應該會好好多．

鹹雞有得例牌（$3x）上，　半隻就要$7x，　有機會都買個外賣返去食先～～

廚部ｄ姐姐睇唔到店內嘅４部大小不同嘅電視，　不過我坐咁耐，　佢哋就一路播住mui姐同哥哥ｄ歌，　仲要係好早期吓果ｄ，　果然有taste！ 😎